विद्यार्थी संगठनले मागे शैक्षिक ऋण , पुरा गर्ला त अोली सरकारले वाचा ? « Devoted for Economic Devlopment, आर्थिक विकासको लागि समर्पित

Feature News

विद्यार्थी संगठनले मागे शैक्षिक ऋण , पुरा गर्ला त अोली सरकारले वाचा ?



काठमाडौ । अनेरास्ववियु, नेविसंघ र अनेरास्ववियु (क्रािन्तकारी) ले संयुक्तरुपमा त्रिभुवन विश्वविद्यालयलगायत विश्वविद्यालयमा समेत स्वतन्त्र विद्यार्थी युनियन (स्ववियु) निर्वाचनको मिति घोषणा गर्न माग गरेका छन् ।

तीनवटै संगठनका अध्यक्षले शनिबार जारी गर्नुभएको विज्ञप्तिमा यसअघि त्रिभुवन विश्वविद्यालयमा मात्रै हुँदै आएको सो निर्वाचन अन्य शैक्षिक स्थलमा पनि गर्न माग गरिएको छ ।

विसं २०७२ मा त्रिभुवन विश्वविद्यालयका केही कलेजमा निर्वाचन सम्पन्न भएको थियो भने आन्तरिक संगठनको विवादका कारण केहीमा हुन सकेको थिएन ।

संविधानमा व्यवस्था गरिएअनुसार आधारभूत तथा माध्यामिक तहसम्म निःशुल्क शिक्षाको व्यवस्था गर्न माग गर्दै शिक्षा क्षेत्रको समग्र पुनः संरचनाका लागि बजेटको २० प्रतिशत लगानी गर्न आग्रह गरिएको छ ।

अनेरास्ववियुका अध्यक्ष नवीना लामा, नेवि संघका अध्यक्ष नैनसिंह महर र अनेरास्ववियु (क्रािन्तकारी) का अध्यक्ष रञ्जित तामाङले दस्तखत गरी जारी गरिएको विज्ञप्तिमा विद्यार्थीले हासिल गरेको प्रमाणपत्र धितो राखेर शैक्षिक ऋण उपलब्ध गराउनुपर्ने माग गरिएको हो । चर्को शुल्क लिने निजी विद्यालयलाई छानबिन गर्न अधिकार सम्पन्न अनुगमन समिति गठन गर्न बैठकले सरकारलाई ध्यानाकर्षण गराइएको छ ।

भूकम्पले ध्वस्त भएका विद्यालय, दरबार हाइस्कुललगायत ऐतिहासिक महत्वको शैक्षिकस्थल द्रुत गतिमा पुनःनिर्माणका लागि माग गरिएको छ ।

पूर्वाञ्चल विश्वविद्यालयबाट सम्बन्धन प्राप्त ओएसिसी मेडिकल कलेजका विद्यार्थीलाई नर्सिङ काउन्सिलको परीक्षा दिने वातावरण मिलाउन विज्ञप्तिमा आग्रह गरिएको छ ।

प्रकाशित : २८ फाल्गुन २०७४, सोमबार १४:१५