राहतमा अनियमितता ,५७ हजार ब्लांकेट हराए

काठमाडौं ।  बंगलादेशले भूकम्पपीडितको नाममा पठाएको करिब ५७ हजार थान ब्लांकेट हराएका छन्। वैशाख १२ गतेको शक्तिशाली भूकम्पपछि बंगलादेशले हवाई र सडक मार्गबाट ५९ हजार २ सय ७२ थान ब्लांकेट पठाएको थियो। विदेशबाट आउने राहत सामग्रीको तथ्यांक राख्ने तथा वितरण गर्ने जिम्मेवारी पाएको गृहमन्त्रालयले बंगलादेशबाट २ हजार ४ सय ७८ थान ब्लांकेट मात्र प्राप्त भएको देखाएको छ। अरू ब्लांकेट कहाँ छन् तथा कहाँ गए भन्नेमा गृह मौन छ।

नागरिक दैनिकमा सुरेन्द्र पौडेल लेख्छन्– बंगलादेशको काठमाडौंस्थित दूतावासका अनुसार ५९ हजार २ सय ७२ थान नै ब्लांकेट तीन साताअघि नेपाल भित्रिएका हुन्। केही ब्लांकेट बंगलादेशी सेनाको हवाईजहाजमार्फत सिधै र केही ट्रकबाट सडकमार्ग हुँदै काठमाडौं ल्याइएको थियो। सडकमार्ग हुँदै ल्याइएका ब्लैंकेट बंगलाबन्ध, फूलबारी, पानीट्यांकी हुँदै काँकडभिट्टा नाकाबाट नेपाल भित्रिएको दूतावासले जनाएको छ।

‘हामीले दुई साताअघि नै ब्लांकेट नेपाल सरकारलाई बुझाएका हौं,’ दूतावास स्रोतले भन्यो। बंगलादेश सरकार, त्यहाँका विभिन्न संघसंस्था तथा बैंकको सक्रियतामा संकलन गरी ती ब्लांकेट नेपाल ल्याइएको थियो। हवाई मार्ग हुँदै ल्याइएका ब्लांकेट त्रिभुवन अन्तर्राष्ट्रिय विमानस्थलमा नेपाली सेनाले बुझेर गृहलाई जिम्मा दिएको थियो। सेनाले अन्य देशबाट आएका केही ब्लांकेट राखी भूकम्प प्रभावित क्षेत्रमा वितरण गर्दै आएको भए पनि बंगलादेशबाट हवाई मार्ग हुँदै आएका सबै ब्लांकेट गृहलाई बुझाएको थियो।

‘बंगलादेशबाट हवाई मार्ग हुँदै आएका २५ हजार ५८ थान ब्लांकेट हामीले गृहलाई बुझाइसकेका छौं। बंगलादेशबाट आएको एक थान ब्लांकेट पनि सेनाले लिएको छैन,’ एक उच्च सैनिक स्रोतले भन्यो। बाँकी ३४ हजार २ सय १४ थान ब्लांकेट सडक मार्ग हुँदै आएको सेनाले जनाएको छ। तर, गृहले भने बंगलादेशबाट २ हजार ४ सय ७८ थान मात्र ब्लांकेट नेपाल भित्रिएको दाबी गरेको छ।

उपप्रधान तथा गृहमन्त्री वामदेव गौतमले रेडक्रसले बाँडेको १७ हजार १ सय ५५ समेत जोडी हालसम्म १ लाख ८३ हजार ९४ थान ब्लांकेट भूकम्प प्रभावित क्षेत्रमा वितरण गरेको विवरण गत साता संसदीय समितिमा पेस गरेका थिए। उनले हालसम्म विभिन्न १८ देशले पठाएका २ लाख ५७ हजार ९ सय ४८ थान ब्लांकेट बुझिसकेको दाबी गरे।

गृहका अनुसार भारतले १ लाख ८६ हजार ५, पाकिस्तानले ३ सय ३०, बैगलादेशले २ हजार ४ सय ७८, चीनले १६ हजार ४ सय ५६, थाइल्यान्डले १९ हजार ९ सय १४ र हङकङलेे ५ हजार १ सय ७८ थान ब्लांकेट पठाएका छन्। यस्तै, सिंगापुरले ३ हजार ३ सय २०, जापानले २ हजार ५ सय, अल्जेरियाले २ हजार ८ सय ८२, दक्षिण कोरियाले २ हजार ४ सय र इन्डोनेसियाले ६ हजार ६ सय ९४ थान ब्लांकेट पठाएका थिए।

यस्तै, नेपालका भूकम्पपीडितलाई श्रीलंकाले ४, अजरबैजानले ४ सय २७, मर्सिकप (संस्था) ले १ सय ३५, स्विट्जरल्यान्डले १ सय ३५, बहराइनले १ सय ६०, कुवेतले १ सय ४० र तुर्किस्तानले ८ हजार ७ सय ९० थान ब्लांकेट पठाएको रेकर्ड गृहले राखेको छ।