‘विदेशी पर्यटकलाई अनअराइभल भिसा प्रदान गर्ने निर्णय स्वागतयोग्य’-परिसंघ « Devoted for Economic Devlopment, आर्थिक विकासको लागि समर्पित

अर्थतन्त्र

‘विदेशी पर्यटकलाई अनअराइभल भिसा प्रदान गर्ने निर्णय स्वागतयोग्य’-परिसंघ



काठमाडाैं । कोभिड १९ विरुद्धको खोपको मात्रा पूरा गरेका विदेशी नागरिकलाई नेपाल प्रवेशका लागि अनअराइभल भिसा प्रदान गर्ने नेपाल सरकारको निर्णयलाई नेपाल उद्योग परिसंघले स्वागत गरेको छ।

सरकारको यो निर्णय कोभिड १९ का कारण गम्भीर असर परेको पर्यटन क्षेत्रलाई पुनस्र्थापित गर्न र पर्यटन उद्योगको पुनरोत्थानका लागि सकारात्मक पहल हुने परिसंघको ठहर छ ।परिसंघले यसका लागि नेपाल सरकारलाई धन्यवाद समेत दिएको छ ।

बिहीबार साँझ एक विज्ञप्ति जारी गर्दै परिसंघले कोभिड १९ को प्रभाव बढ्दै जाँदा सरकारले अनअराइभल भिसा जारी गर्ने प्रक्रिया रद्द गरेकोमा यसलाई पुनः सुरु गर्ने निर्णयले नेपालमा विदेशी पर्यटन आवागमनमा वृद्धि भइ पर्यटन क्षेत्रसँग सम्बन्धित गतिविधि पूर्ववत् अवस्थामा फर्कने दाबी गरेको छ ।

अनअराइभल भिजा खुला भएसँगै ट्राभल, ट्रेकिङ र पर्वतारोहण क्षेत्रसँग सम्बन्धित गतिविधिलाई सहज रूपमा अघि बढाउन सरकारले समन्वय गर्नुपर्नेमा परिसंघको जोड छ ।

सरकारले अनअराइभल भिसा खुला गरे पनि अझै केही मुलुकले नेपाललाई ‘रेड लिस्ट’मा राखेको छ । नेपाल सरकारले नेपाल कोभिडबाट सुरक्षित रहेको सन्देश अन्तर्राष्ट्रिय समुदायलाई दिएर पर्यटकलाई सुरक्षित गन्तव्यको पहिचान दिनुपर्नेमा परिसंघको जोड रहेको छ ।

‘नेपाल सरकारले कुटनीतिक पहलमार्फत सम्पूर्ण देशहरुलाई नेपाललाई रेड लिस्टबाट हटाउन पहल गर्नुपर्छ,’ परिसंघका अध्यक्ष विष्णुकुमार अग्रवालले भने, ‘अब देशभित्र सम्पूर्ण नागरिकलाई शीघ्र खोप उपलब्ध गराउने र विदेशी नागरिकलाई नेपाल सुरक्षित रूपमा घुम्न सकिन्छ भन्ने सन्देश दिनुपर्छ ।’

आदेशअनुसार नेपाल प्रवेश गर्ने सबै विदेशी नागरिकले नेपालस्थित अध्यागमन प्रवेश विन्दूमा एन्टिजेन परीक्षण गर्नुपर्नेछ । एन्टिजेन पोजिटिभ देखिए पर्यटकहरु आइसोलेसनमा बस्नुपर्नेछ भने नेगेटिभ आएमा आफ्नो गन्तव्य प्रस्थान गर्न सक्नेछन् । परिसंघले कोभिड १९ विरुद्धको खोपको पूर्ण मात्रा प्राप्त गरेका सबै नागरिकलाई सहज रूपमा नेपाल भ्रमणको व्यवस्था मिलाउन सरकारलाई आग्रह गरेको थियो ।

मन्त्रिपरिषदको यही २०७८ असोज ६ गतेको बैठकले ‘विदेशबाट नेपाल आगमन हुने र नेपालबाट प्रस्थान गर्ने यात्रुहरुको यात्रा व्यवस्थापन सम्बन्धी आदेश २०७८’ स्वीकृत गरेको थियो । यही आदेशमा विदेशबाट नेपाल आउने यात्रुले पालना गर्नुपर्ने नियमहरु उल्लेख गरिएको छ ।

प्रकाशित : ७ आश्विन २०७८, बिहीबार २१:११