‘बाहुबली’को सफलता,दुई दिनमै सय करोड

बलिउडमा अहिले चलचित्र बाहुबलीले तहल्का मच्चाएको छ। शुक्रबार रिलिज भएको यो चलचित्रले दुई दिनमै सय करोड भारुभन्दा धेरै कमाएर रेकर्ड बनाएको छ। 

बक्स अफिसमा बाहुबलीको दबदबाले अहिले तीन खान सलमान, शाहरुख र अमिरलाई छायामा पारिदिएका छन्। यो चलचित्रले पहिलो दिन लगभग ५० करोड भारु र दोस्रो दिन ५५ करोड भारु कमाउँदै इतिहास रच्न सफल भएको हो।

बाहुबलीलाई बलिउड इतिहासमै सबैभन्दा महँगो चलचित्र मानिएको छ। दुई सय ५० करोड भारुको लागतमा बनेको यो चलचित्र प्रभावकारी इफेक्ट राखेर बनाइएको छ।

तमिल, तेलगू, मलयालम, फ्रेन्च र हिन्दी गरी पाँच भाषा डबिङ गरी एकसाथ रिलिज गरिएको यो चलचित्रको सफलताले ठूलो लगानीमा स्तरीय चलचित्र निर्माणका लागि सबैलाई प्रोत्साहित गरेको समीक्षकको भनाइ छ।

एसएस राजामौलीको निर्देशनमा बनेको यो चलचित्रमा तमन्ना भाटिया, प्रभास, राणा दग्दुबती, अनुष्का सेट्टीलगायतका कलाकारले अभिनय गरेका छन्। सबै नयाँ कलाकार रहेको यो चलचित्रको सफलताले बक्स अफिसमा राज गर्दै आएका स्टार कलाकारलाई चुनौती दिएको छ।