आर्थिक वृद्धिदर ६ प्रतिशत रहने « Devoted for Economic Devlopment, आर्थिक विकासको लागि समर्पित

Feature News

आर्थिक वृद्धिदर ६ प्रतिशत रहने

प्रकाशित मितिः १ असार २०७९



काठमाडौँ । चालु आवमा ६ प्रतिशतको आर्थिक वृद्धिदर हुने अर्थ मन्त्रालयले जनाएको छ । बजेटको अर्धवार्षिक समीक्षाअनुसार बाढीका कारण वर्षे बालीमा परेको नकारात्मक असरका कारण लक्ष्यभन्दा केही कम आर्थिक वृद्धि हुने देखिएको हो । सरकारले चालु आवको बजेटमा ७.२ प्रतिशतको आर्थिक वृद्धि हुने लक्ष्य लिएको थियो ।

त्यसैगरी समीक्षा अवधिमा ३.५ प्रतिशत मुद्रास्फ्रीति कायम रहेको र चालु आवको अन्त्यसम्ममा ६ प्रतिशत रहने अनुमान गरिएको छ । मुद्रास्फ्रीति ७ प्रतिशतमा राख्ने लक्ष्य लिइएको थियो ।

यस अवधिमा वैदेशिक रोजगारको संख्या १.८ प्रतिशतले घटेको र विप्रेषण आप्रवाहमा पनि ०.५ प्रतिशतले ह्रास आएको आज अर्थ मन्त्रालयले सार्वजनिक गरेको अर्थवार्षिक समीक्षा प्रतिवेदनमा उल्लेख छ ।

त्यसैगरी कूल वस्तु निर्यात १३.४ प्रतिशतले वृद्धिभएको, वस्तु आयातमा १५ प्रतिशतले बढेको र कूल व्यापार घाटा १५.१ प्रतिशतले वृद्धि भई चार खर्ब ९३ अर्ब २ करोड पुगेको छ ।

शोधनान्तर स्थिति रु ६ अर्ब ६६ करोडले घाटामा र चालु खाता रु ७ अर्ब ७१ करोडको घाटा रहेको छ । विदेशी विनिमय सञ्चितिमा १.१ प्रतिशतले कमी आई रु १० खर्ब ६७ अर्व ३४ करोड रहेको प्रतिवेदनमा उल्लेख छ ।

कूल सरकारी खर्च ४५.५ प्रतिशतले बढेको तर राजस्व असूली २०.७३ प्रतिशतले बढ्न गई नगद प्रवाहमा आधारित बजेट घाटा रु ३५ अर्ब ४७ करोड रहेको छ ।

यसअवधिमा कूल रु १२ खर्ब ७८ अर्ब ९९ करोडको ३१.२३ प्रतिशत मात्र खर्च भएको छ । चालुतर्फ ४१.२० प्रतिशत, पूँजीगततर्फ १४.३५ प्रतिशत र वित्तीय व्यवस्थातर्फ १४.४१ प्रतिशत खर्च भएको छ ।

प्रतिवेदनका अनुसार कूल खर्चमा सरकारको स्रोतमा गतवर्ष भन्दा ५३.३९ प्रतिशतले वृद्धि भएको, वैदेशिक ऋण १८.३३ प्रतिशत परिचालन र वैदेशिक अनुदान ५२.०५ प्रतिशतले घटेको छ ।
त्यसैगरी स्थानीय तहको तेस्रो चरण, प्रदेशसभा र संघीय संसद्को निर्वाचनमा रु १८ अर्ब ३१ करोड खर्च भएको अनुमान गरिएको प्रतिवेदनमा उल्लेख छ ।

प्रकाशित : २३ फाल्गुन २०७४, बुधबार २१:५१