वीमाले उचालेको नेप्से वीमाले नै ओराल्यो

नेपाल स्टक एक्सचेन्जमा मंगलबार पनि वीमा कम्पनीहरुको शेयरमा उतार चढाव देखा पर्दा समग्र बजार ओरालो लागेको छ । पूँजी बृद्धिको हल्लामा बीमा कम्पनीहरुको शेयर मूल्य लगातार बढेको बजार पछिल्लो दुईदिनमा भने घटेको छ । मंगलबार प्राविधिक समस्याले नेप्सेको वेबसाइट नचल्दा लगानीकर्ताहरुले मार्केट डेप्थ लगायतका सूचनाबाट बञ्चित हुन पुगे ।

मंगलबार नेप्से ७.८५ अंकले घटेर ११४६ अंकमा पुगेको छ । होटल र जलविद्युत बाहेक सबै समूहमा आएको गिरावटले नेप्से झरेको हो । यसदिन बीमा समूहको परिसूचक १७२.८४ अंकले ओरालो लागेको छ ।

दिनभर १२८ कम्पनीको कारोबार भएको बजारमा ४१ करोड ४२ लाख बराबरको कारोाबार भएको छ ।अधिल्लो दिनको तुलनामा मंगलबार कारोबार रकम झण्डै नौ करोड रुपैयाँले घटेको छ ।

यसदिनको कारोबारमा इनोभेटिभ डेभलपमेन्ट बैंकका लगानीकर्ताले सबैभन्दा धेरै कमाएका छन् । यो कम्पनीको शेयरमूल्य दश प्रतिशतले बढेको छ । त्यसपछि महिला सहयात्रा र शुभेच्छा विकास बैंक धेरै कमाउने परेका छन् ।

नेपाल इन्स्योरेन्स मंगलबार सबैभन्दा धेरै गुमाउने कम्पनीमा परेको छ । यो कम्पनीको शेयरमूल्य करिब आठ प्रतिशतले घटेको छ । यसपछि जानकी फाइनान्स, लुम्बिनी इन्स्योरेन्स, प्रुडेन्सियल इन्स्योरेन्स लगायतका कम्पनी परेका छन् ।

धेरै गुमाउने कम्पनीको सूचीमा आधादर्जन वीमा कम्पनी देखापरेका छन् ।
अघिल्लो दिन मात्र २५ प्रतिशत बोनस सेयरसहित २६ प्रतिशत लाभांश घोषणा गरेको लाइफ इन्स्योरेन्स कर्पोरेसन नेपालको सेयरमूल्य पाँच प्रतिशत भन्दा धेरैले घटेको छ ।

मंगलबारको कारोबारमा एनआईसी एशियाको सबैभन्दा धेरै ४ करोड २५ लाख रुपैयाँ बराबरको कारोबार भएको छ । त्यसपछि धेरै कारोबार गर्ने नेशनल लाइफ इन्स्योरेन्सले पनि २ करोड बढिको कारोबार गरेको छ । अन्य चार वीमा कम्पनीले पनि करोड बढिको कारोबार गरेका छन् । यसदिन पनि धेरै कारोबार गर्ने कम्पनीमा वीमा कम्पनीहरुनै अगाडि देखिएका छन् ।

शेयर संख्या हिसाबले भने नेशनल हाइड्रो अग्रपंंितमा रहेको छ । यो कम्पनीको ५० हजार कित्ता शेयर खरिदबिक्री भएको छ ।

नेप्सेको वेबसाईटमा समस्या हुँदा लगानीकर्ता मर्कामा

मंगलबार नेप्सेको वेवसाइट लगभग कारोबार अवधिभर नै अपडेट हुन नसक्दा लगानीकर्ता भने आवश्यक सूचनालिन बाट बञ्चित भएका थिए । नेप्सेले अघिल्लो साताबाट मात्र मार्केट डेप्थ हेर्न सकिने सुविधा थपेको थियो । कारोबार अवधिभर नै सोमबारको तथ्यांक देखिएको नेप्सेको वेबसाईट बजार बन्द हुनु भन्दा केहिक्षण अघि मात्र सुचारु भएको थियो । नेप्सेको वेवसाइट तथा एप हेर्ने लगानीकर्ताले कारोबार बन्द भइसकेपछि मात्रै मंगलबारको विवरण पाएका थिए । नेप्सेले अप्टिकल फाइबरमा देखिएको प्राविधिक समस्या कारणले वेबसाईट संचालन नभएको जनाएको थियो । समस्या समाधान भएपछि मात्र वेबसाईट संचालनमा आएको नेप्सेको भनाई छ ।