राष्ट्रिय पुनर्निर्माण प्राधिकरणमा कर्मचारीकै लफडा

काठमाडौं । राष्ट्रिय पुनर्निर्माण प्राधिकरण गठन भएको करिव चार महिना बितिसकेको छ। भूकम्प प्रभावितलाई छिटो र छरितो ढंगले  पुनर्वासको कार्यक्रम अगाडि बढाउनु पर्ने केन्द्रीय निकाय आफै भने जनशक्ति अभावमा समस्यामा परेको छ।

२ सय ८ कर्मचारीको दरबन्दी रहेको कार्यालयमा सरकारले करिब आधा कर्मचारी मात्रै खटाउन सकेको छ। सामान्य प्रशासन मन्त्रालयले १ सय २५ जना कर्मचारी प्राधिकरणमा खटाइसकेको जनाएको छ। ८३ कर्मचारी अझै अपुग छ।

तर खटाइएका भनिएकाहरु पनि प्राधिकरणमा हाजिर भएका छैनन्। प्राधिकरणमै गएका केही कर्मचारी अन्यत्र फर्किएका छन्। सरकारले आफूले प्राथमिकतामा राखेको कार्यसम्पादन गर्नेै अड्डामा नै जनशक्ति परिचालन गर्न सकेको छैन।

प्राधिकरणमा उच्च तह र प्राविधिक जनशक्ति व्यवस्थापनमा ठूलो समस्या छ। १० सहसचिवको दरबन्दी रहेकोमा ५ जना मात्रै खटिएका छन्। कान्तिपुर दैनिकमा समाचार छ – करिब २० इन्जिनियर र २२ कम्युटर अपरेटरको पद रिक्त छ।