सहकारीले गरेका राम्रो कामको प्रचार गर्नुपरो

कैलाश भक्त प्रधानाङ्ग, पूर्व अध्यक्ष नेफ्स्कून

अहिले केही सहकारीले जनताको पैसा उठाएर हिडेका छन् त्यसको विषयमा सशक्त आवाज उठाएर कारबाहीको दायरामा ल्याउन आवश्यक छ ।

नेफ्स्कुनले सदस्यको हितमा निकै राम्रो काम गरिरहेको छ । सदस्यता, पुँजी विस्तार गरेको देखिन्छ । संस्था र सदस्यको हितमा काम गरिरहेको छ । तर मैले कहाँ कमजोरी देखेको छु भने संस्था र केन्द्रको बीचमा आत्मियता र विश्वास हुनुपर्ने हो त्यो कमजोरी भएको मैले देखेको छु ।

यसको लागि संस्थागत रुपमा प्रतिनिधित्व गर्न आवश्यक छ । आफ्नो सदस्यको हित हुने काममा ध्यान दिनुपर्यो । अहिले केही सहकारीले जनताको पैसा उठाएर हिडेका छन् त्यसको विषयमा सशक्त आवाज उठाएर कारबाहीको दायरामा ल्याउन आवश्यक छ ।

पैसा राख्ने राखिरहने, भाग्ने भागिरहनेहरुले गर्दा धेरै मानिस यसबाट पीडित बनेका छन् । यसले गर्दा सहकारीले गरेको राम्रो कामको प्रचार हुन सकेन । नराम्रो कामको बढी प्रचार भयो । सहकारीले पाउने प्रतिष्ठामा आँच आएको छ । यसमा नेफ्स्कुन, सहकारी महासंघ, सहकारी बैंकको पनि कमजोरी रहेको छ ।

सहकारीले गरेका राम्रो कामको प्रचारको अहिलेसम्म रेकर्ड कतै पनि राखिएको छैन । रेकर्ड नभएपछि त्यो कुरा पत्याउन गाह्रो छ । अब यसमा ध्यान दिन आवश्यक छ । सहकारी गरिबी निवारणका लागि पनि आएको हो । मन्त्रालयको नाम पनि गरिबी निवारण मन्त्रालय रहेको छ । सहकारी ऐन नियमावलीमा १३ वटा कोष छ तर गरिबी निवारण कोष छैन । यसमा मन्त्रालय, नेफ्स्कुन, महासंघ, बैंक सदस्य कसैको पनि ध्यान गएन । सहकारीको मुल मर्म भनेको गरिबी निवारणको लागि काम गर्ने हो । त्यो हुन सकेन । अब यसमा पनि ध्यान दिने हो की । सहकारीले आफ्नो उद्देश्य र सिद्दान्त बिर्सनु हुँदैन । यसमा नेफ्स्कुनले ध्यान दिन आवश्यक मैले देखेको छु ।

तालिम, शिक्षा र प्रविधिसँग जोडेर सहकारीलाई अघि बढाउन आवश्यक छ

मिनराज कडेल, पूर्व अध्यक्ष, नेफ्स्कून

नेफ्स्कूनले ब्राण्डिङसँग जोडेर सहकारीहरुलाई सुव्यस्थित, सुशासित रुपमा अघि बढाउनुपर्छ । अब धेरै संस्था आवश्यक छैन ।

नेफ्स्कुनले अहिले सदस्यको हितमा निकै प्रभावकारी रुपमा काम गरिरहेको छ । बचत तथा ऋण सहकारी संस्थाको हित प्रबर्धनमा निकै राम्रो काम गरिरहेको छ । साकोस अभियानलाई कसरी व्यवस्थित गर्ने, सदस्यको पुँजी रिचालन गरेर उनीहरुको जीवन स्तरलाई बदल्नको लागि पहल गर्ने काम गर्ने हो । जुन भइरहेको छ ।

नेफ्स्कुनले आगामी दिनमा अझै प्रभावकारी रुपमा विभिन्न विषयमा लबिङ, एडभोकेसीको काम गर्दै जानुपर्छ । साकोस अभियानको हित प्रबर्धनको लागि साकोसको पुँजीलाई परिचालन गरेर आफ्नो सदस्यको जीवनस्तर बदल्ने, आर्थिक, सांस्कृतिक, सामाजिक र वातावरणीय क्षेत्रमा काम गर्नको लागि सरकारी र विभिन्न निकायसँग लबिङ गर्ने काम भइ नै रहेको छ । जुन निरन्तर हुनुपनि पर्छ ।

तालिम, शिक्षा र प्रविधिसँग जोडेर सहकारीलाई अघि बढाउन आवश्यक छ । स्वमिनयमान चल्नको लागि सघन अनुगमनको कामलाई प्रभावकारी बनाउनुपर्छ । अनुगमन भयो भने कुनै समस्या आउन दिनु हुँदैन । त्यसको लागि तालिम, शिक्षा र प्रविधिलाई सँगै लैजानुपर्छ ।

नेफ्स्कूनले ब्राण्डिङसँग जोडेर सहकारीहरुलाई सुव्यस्थित, सुशासित रुपमा अघि बढाउनुपर्छ । अब धेरै संस्था आवश्यक छैन । पहिला संस्था खोलियो । अब मर्जरमा जानुपर्छ । यसमा नेफ्स्कुनले पहल गरिरहेको छ । अझै यसमा चाहिने प्रविधिको लागि पहल आवश्यक छ ।

बचत सही रुपमा परिचालन गर्न, राष्ट्र बैंकले जारी गर्ने ऋणपत्र खरिद गर्नुपर्छ । कोषको रकम र सेयरको पुँजीलाई संस्थाले पनि उत्पादन र व्यवसायसँग जोडेर लैजान आवश्यक छ । परियोजनामा लगानी गर्न सक्ने बाताबरण अहिलेको आवश्यकता हो । सहकारीले पैसाको लागि काम गरे, उत्पादन व्यवसायमा लागेनन् भन्ने आरोप आउने गरेको छ । कोषको रकम र सेयर पुँजीको केही प्रतिशत उत्पादन त व्यवसायमा जोडेर काम गर्न पहल गर्न आवश्यक छ ।

नेफ्स्कुनको ४ वर्षे रणनीति धेरै राम्रो छ । ४ वटा लक्ष्य र थप ७ रणनीति बनाएको छ । यसलाई सुव्यस्थित रुपमा अभि बढाउन सकेको खण्डमा साकोस अभियानको उचाई माथि उठाउँछ । सदस्यलाई दिने सेवामा बढोत्तरी हुनेछ । संविधानले भनेको गरिबी न्यूनिकरणमा, समाजवाद उन्मुख अर्थतन्त्र निर्माण गर्न, सुखि नेपाली समृद्ध नेपाल निर्माण गर्नको लागि, दिगो विकास लक्ष्य पुरा गर्नको लागि सशक्त भूमिका निर्वाह गर्न सक्नेछ ।

साकोसको अनिवार्य एकिकरणको प्रावधान राखेर ऐन ल्याउन आवश्यक छ

ऋषि राज घिमिरे, पूर्व अध्यक्ष, नेफ्स्कून

कार्यक्षेत्र भन्दा बाहिर गएर काम गर्ने, एकिकरण भद्रगोल बनाउने, काम गर्नु भएन । एउटा एरियामा भएका सहकारीलाई एकिकरण गरेर जानु पर्ने हुन्छ ।

नेफ्स्कुनले बचत तथा ऋण सहकारीको हितमा निकै राम्रो काम गरिरहेको छ । अबको दिनमा नेफ्स्कूनको दिगोपनामा अझ शसक्त भएर काम गर्नका आवश्यक छ । नेफ्स्कून ४ हजार मात्रै होइन की १२ हजार बचत तथा ऋण सहकारीको अभिभावको रुपमा काम गर्नको लागि छुट्टै ऐनको आवश्यक छ । त्यो ऐन ल्याउनको लागि अभियानका सदस्यलाई बुझाउने, सरोकारवाला निकायलाई बुझाउने र सरकारी निकायलाई बुझाएर ऐन ल्याउन आवश्यक छ । त्यसमा शसक्त अनुगमन गर्न सक्ने बुँदाहरु राखेर, अनिवार्य एकिकरणको प्रावधान राखेर ऐन ल्याउन आवश्यक छ ।

यसले अभियानको धुमलिएको छविलाई अझै उच्च बनाउने सहयोग पुग्ने छ । कार्यक्षेत्र भन्दा बाहिर गएर काम गर्ने, एकिकरण भद्रगोल बनाउने, काम गर्नु भएन । एउटा एरियामा भएका सहकारीलाई एकिकरण गरेर जानु पर्ने हुन्छ । जबसम्म बचत तथा ऋणको छुट्टै ऐन आउँदैन तब सम्म यो विषय कार्यान्वयनमा आउँदैन । यसको लागि सरकार र अभियानले पनि बुझ्नु पर्छ । उनीहरुले नबुझेसम्म यो यस्तै नै चलिरहन्छ । केही व्यक्तिका कारण अभियानको छवि धमिलो भएको छ । छुट्टै ऐन भयो भने यो समस्या हट्दै जाने छ ।

स्थिरिकरण कोषलाई प्रभावकारी रुपमा लैजानु पर्छ

डिबी बस्नेत, पूर्व अध्यक्ष नेफ्स्कून

सुशासनको क्षेत्रमा नेपालमा कुनै निकायले काम गरिरहेका छ भने त्यो नेफ्स्कुन नै हो ।

नेफ्स्कूनले आफने उद्देश्य अनुसार नै काम गरिरहेको छ । अहिले बचत तथा ऋण सहकारी अभियानलाई सरकारले धेरै सहयोग गरेन । त्यसले गर्दा केही समस्या देखिएको छ ।

स्थिरिकरण कोषलाई प्रभावकारी रुपमा लैजानु पर्ने छ । सुशासनको क्षेत्रमा नेपालमा कुनै निकायले काम गरिरहेका छ भने त्यो नेफ्स्कुन नै हो । नेफ्स्कुनले यो अभियानलाई अघि बढाएको छ । यसमा अनुगमनलाई प्रभावकारी रुपमा अघि बढाउन आवश्यक छ ।

सरकार वा राष्ट्र बैंकले यसमा सहयोग गरेको भए अझ राम्रो हुने थियो । सरकारको सहयोग नभएका कारण बचत तथा ऋण सहकारीले पैसा जम्मा गरे तर उत्पादनमा लागेनन् भन्ने गरिएको छ ।

उत्पादनमा जानको लागि ३७, ३८ वटा कानूनले अवरोध गरिरहेका छन् । कानूनी रुपमा निकै अवरोध रहेको छ । कानूनी अवरोध हटाउने हो भने नेफ्स्कुनलाई आफ्नो उद्देश्य अुनसार काम गर्न निकै सजिलो हुने थियो ।

अहिले समयानुकुल ऐन संशोधन होस भनेर राष्ट्रिय सहकारी महासंघ मार्फत काम गरिएको छ । त्यो विषय संसदमा लैजाने भनेको अहिलेसम्म हुन सकेको छैन ।

धेरै समयदेखि क्रेडिट यूनियन ऐनको माग भएको छ । म अध्यक्ष हुँदा नै ड्राफ्ट बनाएर पेश गरेको हो । त्यो ऐन बनाएर बचत तथा ऋण ऐन मार्फत सञ्चालन गर्नुपर्ने भनेको । हामी सबैको तिब्र माग रहेको छ । सरकारी निकाय सुस्त भएर समय लागेको छ । यो काम पनि शिघ्र भयो भने नेफ्स्कुनलाई काम गर्न झनै सजिलो हुनेछ ।