Feature News

शेयर कारोबार अनिश्चित



काठमाडौं। महाभुकम्पले देशमा ठूलो धनजनको क्षति गरेपछि बैसाख १३ गते यता नेपाल स्टक एक्सचेन्जमा शेयर कारोबार अबरुद्ध रहेकोमा अनिश्चितकालका लागि कारोबार स्थगित गरिएको छ ।

नेप्सेले शेयर दलालहरुले आफ्नो कार्यालयमा क्षति पुगेको भनी निबेदन गरेको र सीडीएससी रहेको भवन चर्किएको कारण देखाउँदै अनिश्चित कालका लागि कारोबार स्थगित गरेको हो । नेप्से संचालक समितिको आईतबार बसेको बैठकले शेयर दलालहरुले भुकम्पका कारण आफ्ना कर्मचारीहरु तत्काल काममा फर्किन नसक्ने अबस्था रहेको र सीडीएससीको कार्यालय ‘रहेको शिखर बिज सेन्टरको भवन चर्किएर राफसाफको काम गर्न नसकिने अबस्था आएको बारेमा छलफल गर्दै तत्काल कारोबार संचालन नगर्ने निर्णय गरेको हो ।

नेपाल ईन्भेष्टर फोरम र ब्रोकर एशोसियशनले भुकम्प पीडितको राहतमा जुट्न परेको कारण देखाउँदै शेयर कारोबार एक महिनापछि सार्न माग गरेका थिए । बैठकपछि नेप्सेले जारी गरेको प्रेस बक्तब्यमा कारोबार संचालन हुने मिति नतोकी छिटो भन्दा छिटो कारोबार संचालन गर्न प्रयास भईरहेको र यसले चाडै नतिजा दिने उल्लेख गरिएको छ । अहिलेको अबस्थामा शेयर कारोबार संचालनमा ल्याउदा बजार थाम्न नसक्ने गरी घट्ने आँकलन गर्ने केही लगानीकर्ताहरुलाई भने यसबाट राहत पुगेको देखिएको छ ।

यसैबीच नेप्सेले भुकम्प पीडितहरुको राहत तथा उद्धारका लागि ५० लाख रुपैयाँ प्रधानमन्त्री दैबी प्रकोप उद्धार कोषमा उपलब्ध गराउने भएको छ । साथै नेप्सेका कर्मचारीहरुले सात दिन बराबरको पारिश्रमिक सो कोषमा दाखिला गर्ने जनाईएको छ ।

प्रकाशित : ३० बैशाख २०७२, बुधबार ०९:३९